Archive for the Keunst category

Syn libben like as beferzen,
want de earen sieten ticht,
de tonge wie him stiif
en dochs mocht hy der wêze,
want sa skerp wie syn gesicht
dat it pinseel waard syn geriif.

Hy soe gjin redens ûnderbine,
mar se krasten op papier,
net mei de kolfstôk slaan,
dochs liet er dy ferskine,
ek net glide yn de swier,
hy ried syn eigen baan.

De foarbaan lei er as in spegel
mei it folk fan slach en streek
en yn de middenbaan
wie stean of slydskje regel,
achteroan gie ’t op yn reek,
sa wie syn wintersk dwaan.

Syn libben like as beferzen
mei in baan om op te skampen,
mar syn humor mocht der wêze:
wurk fan de Stomme fan Kampen.

* Hendrick Avervamp (1585-1634)
learde as dôfstom jonkje
it lêzen en skriuwen fan syn heit,
dy’t skoalmaster wie.
Syn skildersoplieding krige er
yn Amsterdam, dêr’t se him ek
syn bynamme joegen.

Hoe giet soks mei twa lytse bern,
dan komt de âldste op besite,
want de âlde mem wol ’t jonkje sjen
dat thúskaam út ‘e Suderkrite.

Fan Egypte nei stêd Nazaret,
omdat Herodus net mear drige,
foar de measten kaam syn dea te let,
dy berntsjes ha de deastek krigen.

Dêr stiet Jehannes libbensecht,
de grutste, mar noch net bysûnder,
ûnbewust fan watfoar hege flecht,
syn mem wit wol fan wei en wûnder.

De lytse Jezus komt oerein,
wit fan gjin flecht of Suderkrite,
hat op neefkes wankje ’t hantsje lein,
syn mem tinkt al oan oare riten.

Dêr stiet Jehannes libbensgrut,
syn hannen binne om te dopen,
út ‘e mûle klinkt it wizend wurd:
sjedêr hiel Israel syn hope.

En Jezus komt út ‘e Jordaan,
syn hege flecht sil hjoed begjinne,
mar de do wol him noch wjukken jaan
om ’t minskdom foar it heil te winnen.

Jan van Scorel

* Peter Paul Rubens (1577-1640)
wie in Flaamske skilder
dy’t syn ynspiraasje opdie yn Italië.
Hy wie fernijend en tige produktyf.