Archive for the Keunst category

Dêr stiet er dan yn Poalske klean
en tusken ark fan it geweld:
de lopen foar de kûgelrein,
de pylken op ‘e bôge lein,
in stielen skyld krekt yn de baan,
in tromme op deryn te slaan,
de fjildhear as de grutte held,
noch efkes foar ’t posearjen stean.

Sy stiet yn lange, ljochte jurk,
it nekje yn de brede kraach,
it snútsje spits as fan in mûs,
de skouders pronkje mei in strûs,
de linkerhân taast om hâldfêst,
de rjochterearm ferdraacht de lêst,
it froutsje fan it goede laach
posearret foar it skilderswurk.

De dialooch is koart en klien:
‘Dy reade blom, stek dy mar op,
ik sjit him samar fan dyn kop!’
‘Dat soest wol wolle, bleke boer,
de anjer stek ik yn de koer.’
Se binne elk in kant út gien.

* Ferdinand Bol (1616-1680)
waard yn Dordrecht berne
en krige syn oplieding
by Rembrandt yn Amsterdam.

** Gerard ter Borch (1617-1681)
hat fiif jier yn it bûtenlân west:
Ingelân, Italië en Spanje.
Hy skildere foaral portretten.

De Hear van Warmond liet my witte:
‘Rykdom sit him net yn in kastiel,
mar earder yn myn lytse faam.’
Doe hat er my op ’t freonlikst hjitten:
‘Meitsje fan myn skat in bûnt tafriel
tegearre mei it laam.’

Soe ik it dan net bûnter meitsje
as de hear Van Warmond hawwe wol,
omdat Jan Steen foar gaos stiet,
dat minsken om myn streken laitsje?
‘k Skilderje it hiele doek wol fol
mei ’t keakeljende liet.

Ik sjoch de lytse faam dêr sitten
tusken minskedwerch en tsjinstfeint yn;
begrutsjen mei it swiere lot
fan wa’t net helje lichems mjitte
glimket heech; ’t alles sinneskyn:
in kleuretút fan God.

*  Jan Steen (1625-1679) fertelt
op it skilderij ‘Fûgelhôf’ yn
skilderstaal it ferhaal
fan Jacoba Marije
en de dieren.