Archive for the Keunst category

Hy wie net ien fan fijântinken
wylst sy hifke elke man
op uterlik
en frege amper nei syn fan,
betsjinne him dan op syn winken.

Hy frege har om wat te drinken
wylst sy wie folslein ferheard
oer ’t uterlik:
in Joad, dat like har ferkeard,
koe dochs net op har sûnens klinke.

Doe liet er har ’t ferline skinke,
folle bekers yn de ban
fan ’t uterlik
fan fiif kear falle op in man,
’t bestean fan blinke en fersinke.

Fersûpe soe se net, mar swinke
nei de djipte fan ’t bestean
yn ’t inerlik,
ien folle beker waard har bean
fan libben wetter om te drinken.

* Bernardo Strozzi (1581-1644),
in Franciskaan,
wurke as skilder
yn Genua en Fenetië.  

De skilder hat in stúdzje makke
yn oaljeferve op paniel,
de opdracht waard syn diel
fan Amsterdam en rie.

Allinnich koed er it net meitsje
de lieder fan folk Israel,
mei rjocht en reden fel,
hie hy ferlet fan rie.

Wylst foar de blauwe tabernakel
de reek fan ’t offer riisde op,
klonk lûd de hege rop
foar santich yn de rie.

De geast besiele wize âldsten
om lieder Mozes by te stean
foar Israel te gean
nei ’t lân fan út ‘e rie.

De skilder hat it grutdoek makke
mei hoeders fan ’t folk Israel,
yn syn tiid it model
foar Amsterdam syn rie.

* Jacob de Wit ( 1696-1754) krige
fan de stêd Amsterdam de opdracht
om in doek fan 12,55 by 5,20 meter
te skilderjen foar de Riedseal yn wat
hjoed de dei it Paleis op de Dam is.
De earste yllustraasje is de foarstúdzje.
De twadde yllustraasje is in detail
fan it doek.