Archive for the Keunst category

Se stiet ferhege, libbensgrut,
yn sânstien, geastessiik beslipe,
har kronkellea ha inkeld nut
as skouspul fan dy gekke typen.

De sânstien is troch waar en wyn
bewurke, hûd en hier fersliten,
har geast wie sûn, mar lang ferlyn
begûn foar har de gekke rite.

In sucht, in skreau, ferskuord de klean,
it hier bliuwt oer om oan te lûken,
de gjalpen kin gjinien ferstean,
har swit lykwols is fier te rûken.

En iepen kreaket lûk nei lûk,
begjinne oaren ek te kriten,
de ien is spin, de oare spoek
oant elk is troch de tiid fersliten.

* Artus Quellinus de Alde (1609-1668)
wie ek byldhouwer fan it Paleis op de Dam.

Lit wêze ’t wurk fan de jurist
de wetten lêze en dan sizze
dat it rjocht gjin wierheid mist
om penitinsje op te lizzen.

Mar ’t wêzen fan de skynjurist
sit yn de mage en de strôte:
letters frette en sa is ’t
yn kombinaasje mei in sâlte.

Dan leit de wierheid yn ’t gesicht
fan rotte fisken, deade hinnen,
wit it bûnt fan rjocht noch plicht,
de swarte kape keart de sinne.

* Giuseppe Arcimboldo (sirka 1527-1593)
wie in keunstner út Milaan,
dy’t 25 jier wurke yn Wenen en Praach
yn tsjinst fan de keizers.
Hy wie mei syn fantastyske komposysjes
in foarrinner fan it surrealisme.