Archive for the Keunst category

It wie ’t seizoen fan jeien
yn de rook fan fjild en wyld,
mei grauwe wolken by it swurk lâns,
ynienen dat feroarjend byld:
syn wrâld lei yn it ljocht te baaien.

Syn wrâld wie bot feroare,
troch de revolúsje yn
it lân koe hy as boarger jeie
op grutwyld, hazze, ein of knyn,
sa rûn hy grutsk yn adels spoaren.

Hy jage mei syn maten,
krige ’t samar yn de poat,
dat hy moast justjes achterbliuwe,
de hûnen… wie ’t net idioat,
as hiene sy it yn de gaten.

It wie as der wat dage…
rûkten se in hazzespoar?
Hy tilde poat en loop wat heger,
mar ’t fiere hynder wie him foar,
de adel hie it wyld ferjage.

* Alexandre Gabriel Decamps (1803-1860)
wie yn syn tiid in ferneamd keunstner,
dy’t tagelyk realistysk en romantysk skildere.
Hy bewûndere Rembrandt.

It daget nei in kleare nacht
mei skiere walen út it wiet,
de sinne, no noch sûnder macht,
brekt troch en spegelet hoe’t it stiet.

De skippen lizze dûbelfêst,
oan kaden en yn kâlde mist,
se stekke yn it read de mêst,
wylst ier de seeman kisten rist.

Mar as de sinne heger riist,
ferskoot syn ljocht fan wolk nei wolk,
it is ’t lazuer dat klear ferwiist
nei ’t hege feest foar hiel it folk.

Dan binne kisten net yn tel,
mar stekke mêsten flaggen út
en meitsje fluiten ’t feestfolk kjel
mei ’t bringen fan in earsalút.

It jûnsljocht sakket nei de grûn
en strykt it wetter yn de tint
fan sa’t it waar ûntjoech him sûn
oerdei en kleur oan djipte wint.

De skoarstiens blaze noch de stoom
út nei in lange, hjitte dei,
it lêste fluitsjen doarmet loom
oer ’t wetter, wiist de nacht de wei.

Trije ympresjonistyske skilders:
* Claude Monet (1840-1926)
Skilderij ‘Ympresje, sinsopgong’

*** Georges Pissarro (1871-1961)
Skilderij ‘De haven fan Rouen’