Archive for the Keunst category

Sy mei der hjoed wol wêze
mei de eachopslach fan hjir bin ik
en hannen foar in twadde slacht,
sy is net slank, mar ek net dik,
dat manlju hat sy yn de macht.

De taarten lit se kuolje,
no it fleis noch, dat fan driften sprekt,
ek pierewoartels lizze klear,
it bern dat út it koalblêd stekt,
dêr moat se op it lêst oer gear.

Dêr stiet se yn it kreamke
mei har taarten, woartels, koal en fleis
op dizze wûndermoaie dei
as ’t folk west hat op beafeartsreis
en rekket fleurich oan de swaai.

Se sjongt: ‘Betaast myn taarten,
priuw it fleis, want godlik is ’t fan smaak,
de pierewoartels binne gear,
it koalblêdbern is yn de maak
en earje ek ús Leave Hear.’

* Pieter Aertsen (1507-1575)
skildere behalve keuken-
en merkstikken ek alterstikken,
dy’t yn de Byldestoarm (1566)
sawat allegear ferlern gien binne.

De hannen kamen spikers yn
en ien, twa, trije, skuorre mar,
wêr wie Marije Magdalena?
Se joegen Him in spûns mei wyn,
de fraach is: hied Er noch de kar?

Hy wie goed santich en net troud,
besûndige him net oan wyn
en hie it mier oan fleis fan bargen;
it libben wie him net fertroud
as kluzener yn de woestyn.

Foar eagen krige hy it krús,
earst noch mei Kristus op it hout,
mar doe… Marije Magdalena…
wie sy dan dochs mei Jezus troud?
Hy fielde him hjir net by thús.

Hy wie goed tritich, mar nea troud,
ferskuord de hannen en de lea
as neisten Him fan ’t krús ôf helje;
dy iene frou, har wêzen rout,
want Jezus hinget slop, is dea.

* Peter Paul Rubens (1577-1640),
berne yn it Dútske Siegen en stoarn yn Antwerpen,
wurdt wol de Flaamske Rembrandt neamd.
Skilderij ‘It krús omheech’
Skilderij ‘Fan it krús ôf’

** Félicien Rops (1833-1898)
wie in Belgyske tekener.
It skilderij ‘De fersiking fan de hillige Antonius’
joech yn België in protte opskuor.