Archive for the Keunst category

Wa hat mei kryst de wierheid fûn
dêr’t ieuwenlang nei omsjoen wurdt
mei ’t skynsel fan it langstme;
men komt faak oan op kâlde grûn
en heart gjin inkeld wurd.

De hoeders komme swijend oan,
ferklomme op ‘e hurde grûn,
mei ’t skynsel fan de lampe;
in jonkje boartet mei de hûn,
it is de hoederssoan.

Marije sit heech op ‘e troan
yn ’t reade kleed fan keningin
mei om de holle ’t skynsel;
it wizend jonkje wit al skoan:
lit wêze sa’t ik bin.

Wa hat mei kryst de wierheid fûn?
Twa jonkjes binne it
by ’t skynsel fan har wêzen;
wêr’t ieuwenlang nei omsjoen wurdt,
hat taal of teken jûn.

* Rembrandt (1606-1669)
wie de skilder fan it ljocht,
dat op it skilderij
‘De oanbidding fan de hoeders’
fan it Kristusbern
en de hoederslampe ôfstrielet.

In libbenlang al yn Sint Petersburch
yn ’t hûs dat sy wurdearren
as feilich honk mei harren hûn,
trou oan elkoar ferbûn,
dêr woene sy ek stjerre.

No binne se ynein fan ’t sjouwen, te wurch
om harren lot te dragen…
wat kin dan noch it iennichst bern
dat stiet it oan te sjen
mei sels in lege mage.

De Neva streamt net mear, mar leit foar dea,
dêrachter riist de fêsting
fan tsaren noch yn it ûnthâld;
hy hat it stjerrend kâld,
sy fielt de sek as lêstding.

De takomst skrynt har troch de skrouske lea
sa ûnderweis tegearre,
de eagen ôfkeard fan it wrak
as byld fan ’t ûnderdak
dat sy al kreakjen hearre.

* Viktor Vasnetsov (1848-1926)
begûn syn karriêre mei realistyske skilderijen.
Letter lei er him ta op it útbyldzjen
fan myten, leginden en mearkes.