Archive for the Keunst category

It wie de ieu fan de foarútgong:
wa’t net fleanend siket, ek net wint,
lang libje it eksperimint
fan ’t hearskip mei de luchtpomp.

In pappegaai moast it ûntlije,
trouwe fûgel mei it minskelûd,
foar ’t pompefleanen ek wol goed,
hy soe him hymjend wije.

Wa’t woe koe ’t pompen observearje,
hoe’t de fûgel yn ’t luchtlege fleach;
al barde ’t mar mei ’t rjochtereach,
elk seach him triomfearjen.

De proef rûn nei de ein en draaide
nei in leech sukses as earder nea,
mar sjoch de pappegaai wie dea
en ’t hearskip pappegaaide.

Sjedêr it spul fan pappegaaien,
wylst de apen binne yn de klim,
sy hawwe by de swarte stim
en neat oer him te kleien.

* Joseph Wright of Derby (1734-1797)
wie portret- en sjenreskilder.
Skilderij ‘Eksperimint mei in fûgel yn in luchtpomp’

It boerelibben lei wol binnen,
mar de âlde hie it hiem
ferkend, dat wie de baas syn doel;
de lears fol snie en skuord de riem,
it bruide der frjemd hinne.

En wylst de dochter siet te spinnen,
skoansoan loarke oan in piip,
de kat spûn súntsjes by it fjoer,
hie pake suver ek de sliep,
dochs moast er moarn wer rinne.

Mar hy hie rûn mei kâlde skonken
foar’t er yn de hutte kaam,
syn biddelrûntsje hold net oer;
gjin houtblok foar it fjoer, hy naam
’t yn hannen: syn tsien fonken.

* Akseli Gallen-Kallela (1865-1931)
skildere it libben fan it ienfâldige folk
yn Finlân.
Skilderij ‘Boerelibben’
Skilderij ‘Biddeljende jonge’