Archive for the Keunst category

Wy binne famkes fan ús heit en mem,
noch lyts, want dêrom binne wy ek bern,
wy sjogge op by heit en nei ús mem,
dat is oan alles wol te sjen.

Ik bin it achte haad fan dit portret,
it hege hearskip yn de maatskippij,
dy’t op papier de rige regels set,
want wet is wet, dêr bliuw ik by.

Ik bin de frouwe fan de kreaze dracht
en klaai mysels yn side en yn kant,
ik nim de etikette graach yn acht…
de dochters? Yn deselde trant.

Wy binne famkes yn deselde dracht
en trant as mem en heit dy bliuwt derby
dat hy ús wolris op ‘e fingers slacht,
want dat heart by de maatskippij.

* Bernardus van Schijndel (1649-1706)
waard yn 1672 boarger fan Ljouwert.
Hy wie learmaster fan de Snitser skilder
Jelle Sibrandsz.

’t Wie yn it hjitste fan de tiid,
doe’t fûgels noch mar amper fleagen,
protters sochten ’t skaad fan ’t dak;
de fjilden wiene giel fan sied,
wat weage boeren wyld foar eagen.

Se skrepten yn de ûngetiid,
gjin ûnderskied fan beide seksen;
foar it skoft socht elk in plak,
de frou mei fuotten heech en wiid,
de boer woe boppe har relaxe.

Sa joegen se har efkes del,
te wurch foar boarst of oare dielen,
’t lichem frege syn gerak
mei beide eagen achter ’t fel
om straks de swierte wer te fielen.

Sy hiene gjin ferlet fan rêst
en lieten beide boarsten drave,
’t iene sûnder ûnderdak;
fan hjitte hiene sy gjin lêst,
se fleagen troch as wite raven.

* Pablo Picasso (1881-1973)
Skilderij ‘Sliepende boeren’
Skilderij ‘Twa dravende froulju op it strân’