Archive for the Keunst category

’t Wie middenyn de revolúsjetiid
fan ’t Frânske folk dat foar de frijheid keas
en tagelyk foar altyd keningleas:
‘Allons enfants, wy geane folút foar de striid!’

Hy neamde him in freon fan ’t Frânske folk,
Marat dy’t fjurrich oprôp ta terreur
en bliede liet dy’t fregen om maleur:
‘Allons enfants, hjir stiet de revolúsjetolk!’

Marat, de keardel mei in dikke hûd,
dy’t troch de skulfers rekke bluodrich tin,
it breindoek foar de pine hie noch sin:
‘Allons enfants, it waarme bad foldocht my goed!’

Charlotte, revolúsjefaam mei moed
en wapen, woe Marat yn ’t neaken sjen,
want sûnder klean en fjoer wie hy in bern:
‘Allons enfants, myn fjurrich skot giet foar syn bloed!’

* Jacques-Louis David (1748-1825)
wie in fjurrich foarstanner fan de Frânske Revolúsje
en waard keazen as lid fan de Nasjonale Konvinsje.
Hy skildere ‘De dea fan Marat’ yn neoklassisistyske styl.

Aljonoesjka, Russysk moaiste,
faam mei eagen dêr’t de siel yn blinkt,
de wetterspegel dy’t dy winkt
as griene djipte dêrst dy earder al mei toaidest.

Kikkerts hawwe dy hjoed roppen,
want do kinst har kwêkerstaal ferstean,
dyn winsk is klaaie yn dy klean,
want út ‘e griene djipte wurdst prinses fan boppen.

Mar dêrboppe binne machten
dy’t oerhearskje wa’t har toait mei ’t grien
fan ’t Russysk lânskip en begien
is mei de djipte dêr’t de kikkerts op har wachten.

Aljonoesjka, no bist finzen:
dûnsje litte sy dy op ‘e snaar
fan eigen wil, in grut gefaar,
mar yn dyn djipgrien kleed fljochtst mei de swan oer grinzen.

* Viktor Michajlovitsj Vasnetsov (1898-1926)
Skilderij ‘Aljonoesjka’
Skilderij ‘De kikkertprinses’