Archive for the Keunst category

Syn spultsje stie op ’t iepen fjild
mei lapkes grûn dy’t hy bewurke
achter ’t hynder, jierrenlang syn maat,
faak sjongend mei de ljurken,
hy koe net stikken, ’t wie syn aard.De minne tiid friet oan it jild
en boppedat oan syn gewisse
doe’t er ’t trouwe dier ferkeapje moast;
hy koe it sels wol risse,
mar yn it libben siet in barst.

De kym wie fier, gjin kop te sjen,
se fûn him plat en út ‘e liken,
raasde om it libben, sûnder baat,
de stêd wie foar de riken,
it iepen fjild lei yn har aard.

Mar fierderop, op ’t beamstamflot,
stie ’t hynder, heech de beide earen,
út ‘e liken nei in drokke dei;
it lot wie net te kearen
dat yn syn aard ek langút lei.

* Akseli Gallen-Kallela (1865-1931)
Skilderij ‘It beamstamflot’

Lit my ’t hawwe oer myn heitelân
dat ieuwenlang beneare waard,
’t manmoedich Poalen,
dat de fijân faak stiek yn de brân
en fage fan Europa’s kaart,
it blette troch syn boalen.

Lit de oprop klinke oer it gea
fan held Kosciusko: ‘Kom en striid
tsjin Rus en boalen,
foar de frijheid fan ús geast en lea,
dan daget moarn in oare tiid,
lang libje ’t fjochtsjend Poalen!’

Dus ik ruile kwast foar it gewear,
de ferve foar patroan mei krûd
en ha doe fochten
as in liuw tsjin Ruslâns wolf en bear,
mar moed ferdronk yn streamen bloed,
’t wie dreger as wy tochten.

Dus ik ruilje myn gewear foar kwast,
de ferve komt yn plak fan krûd
en ûnferhoalen
striid ik strikend op myn skilderspost
de slach dy’t west hat, mar nei hjoed:
lang libje ’t frije Poalen!

* Aleksander Ortowski (1777-1832)
focht mei yn de slach fan 1801
en lei dy mei akwarelferve fêst op doek.