Archive for the Keunst category

De kleuren joegen de emoasje,
Tom mei alle tinten grien,
dy streke hy op hichte del
as master fan de akwarel,
fan beamstam oant ferware stien
as hied er fan de dea al noasje.

Somtiden stûken Tom syn siken,
sloech it hert twa slaggen oer
as waard it fan emoasje kjel,
net oerbrocht op in akwarel,
want alles wie fan koarte doer,
de stiennen langer as de liken.

Dit wiene letter Williams wurden:
‘Wie myn maat yn libben bleaun,
dan kaam myn dei op honger del.’
Doe lôge ’t fjoer mei flammen fel
fier boppe Londen, mar syn freon
koe neat mear mei syn útspraak wurde.

* Thomas Girtin (1775-1802),
in master yn it skilderjen fan akwarellen,
stoar doe’t er noch mar 27 jier wie.

Der wie wol ’t kleare noarderljocht
dat op ferware muorren foel
dy’t oantaast wiene troch de tiid,
mar dat tafriel waard net oan tocht,
de skilder socht in flitsend doel.

De ezel leunde achteroer
en steunde sa it lege doek,
in frjemde wrâld noch wyt en wiid,
mar dat tafriel joech him gjin moer,
hy makke fan dat ark gebrûk.

De skilder stie noch yn bestân
en wachte op ‘e flits, dy tel
dat it mystearje yn him glied
en trochkroep nei syn rjochterhân,
dan streke hy it streekrjocht del.

* Rembrandt (1606-1669)
Skilderij ‘Skilder yn syn atelier’