Archive for the Bibelbylden category

Allinnich Daniël seach oan
hoe skinend oft de ingel wie
en hie neat mear om by te setten,
mei syn wurden wist er him gjin rie,
it klonk hiel oars as kenings wetten.

Syn wurden rekken him yn ’t hert:
‘Ha frede en krij nije moed!’
Doe hat er ek syn lippen rekke,
sa dat Daniël kaam út ‘e noed
en koe foar ’t earst wat wurden sprekke:

‘Sprek mar, myn hear, jo makken sterk
wa’t swak wie, is de wrâld yn tel?’
‘De grutte machten sille brekke
yn de striid mei ingel Michael,
wat letter komt, silst noch ûntdekke.’

* Hans Memling (sirka 1430/1440-1494)
Skilderij ‘Aartsingel Michael’

Doe fleach him oan in geitebok
dy’t út it fiere westen kaam
en mei syn hoarn begûn te stjitten,
dat ferwâde waard de rûge raam,
hy koe him mei de bok net mjitte.

De bok syn hoarnen stjitten ta
nei alle streken fan de wyn,
en nei de stjerren, sels dêrboppe,
sloech wat hillich wie de delte yn…
wa koe ’t grouwélich bist noch stopje?

It wie de fraach fan Daniël
wat raam en bok betsjutten
en sjedêr de ingel Gabriël:

‘Dy bisten binne wrâldske machten:
Meden, Perzen, Grikelân,
dy’t mei geweld regeare,
stribje sels noch hegerop;
de Alderheechste brekt de bân,
oan Him komt ta de eare.’

* Ut ‘Bijbelenzo’
Yllustraasje ‘Fisioen fan de raam en geitebok’