Archive for the Bibelbylden category

Jojada seach it ferfal
rûnom, de timpel net it minst,
Jeruzalem moast oan de bou
mei jeften troch de prystertsjinst,
de tsjinners namen ’t net sa nau.

Nei de fraude kaam it oars:
it jild waard yn in kiste dien
en rekke mei kontrôle fol,
dêrfan betelle waarden hout en stien
en ek de bouwers, grut yn tal.

Joäsj seach it bouwurk oan
en liet him dêroer loovjend út,
hy wie in kening nei Gods hert;
in moard brocht oan syn libben ’t einbeslút,
op restauraasje sloech it net.

In kening moast feroaring bringe,
ien dy’t wer foar de Iene stried,
gjin Baäl-tsjinner libje liet,
gjin ôfgod mocht yn ’t lân wer kringe.

Sa gie it yn dy gaos-dagen,
fan trochinoar nei trou en rjocht,
’t wie Jehû dy’t feroaring brocht,
in kening sûnder wifel-fragen.

Hy spile ’t spultsje fan sabeare:
de goadetimpel as it plak
dêr’t ek de foarst kriich syn gerak,
omdat hy Baäl joech de eare.

It waard in gaos yn de timpel:
gjin Baäl-tsjinner bleau noch oer,
mar foar foarst Jehû waard ’t in toer…
it rjochte paad wie net sa simpel.