Willem Tjerkstra’s thússide

Archive for the Bibelbylden category

admin

Sions laitsjen

Bibelbylden
PDF Print E-mail
fan Peter Paul Rubens*

Benearjend wie it foar Jeruzalem,
want rûnom stiene de soldaten
fan Assyrië om ta te slaan…
wa soe de stêd doe útkomst jaan?
Noch oer bleau de profetestim:

Laitsje, dochter Sion,
laitsje Sanherib mar út,
want wit, syn tiid hat west;
hy hat de mûle iepenskuord,
syn eagen draaiden nei de loft
fan east nei west, fan noard nei súd,
foar him de ierde, God de rest,
mar grutskens rekket oan de ein
en ierdske machten duorje mar in skoft,
dus wit, foarst Sanherib, dyn tiid hat west;
yn Sion komt gjin pylk of wein
fan dy, want dit is Gods beslút:
de himel slacht dyn leger fuort,
de wei werom hast sels al lein,
lit Sion no mar laitsje.

’t Waard neare nacht rûnom Jeruzalem,
ynienen gie de himel iepen
foar de ingelwjuk om ta te slaan
om útkomst oan de stêd te jaan,
dat Sion lake mei ien stim.

Image

* Peter Paul Rubens (1577-1640)
Skilderij ‘De nederlaach fan Sanherib’

admin

Oarlochsretoryk

Bibelbylden
PDF Print E-mail
fan ûnbekend*

It leger fan foarst Sanherib
marsjearre nei Jeruzalem,
de stêd moast komme yn syn grip
nei’t klonken hie foar ’t folk in stim:

Fertrou net mear op farao,
Egypte is in bamboestok
dy’t boarret troch jim hân,
dus harkje skerp, ik sis jim no:
nim net dy gok.

Fertrou ek net mear op jim God,
Hy bringt ferdjer yn plak fan lok,
ús foarst slacht mei syn hân,
dus harkje skerp, want jimme lot
is net in gok.

It folk dat op ‘e muorre stie
fan Davids stêd Jeruzalem,
wist ien ding wis, Hizkia’s rie:
hâld yn betwang jim moed en stim.

Image

* Prisma mei de tekst fan de dieden
fan kening Sanherib fan Assyrië

Archieven

Zoeken

  • Categorie

  • Datum