Archive for the Bibelbylden category

Morêsjet, plak fan de profeet
dy’t wenne mei it útsicht
oer it lân fan noard nei súd;
hy seach de oerdied en it leed,
de earmoed, foar de riken bút,
de Iene joech oan Micha ’t fiersicht.

Omheech it antlit foar it sicht
op ’t wenstee fan de Iene
dy’t net bliuwt sa himelheech,
mar delkomt, want wa docht syn plicht
op ierde? Boarnen reitsje leech,
de bergen misse al it griene.

Omleech it antlit foar it sicht
op ierde, dêr’t de Iene
giet de berch op, komt wer del,
it raant en spjalt, in frjemd gesicht
foar Juda en foar Israel,
dy’t fan de rjochte wegen giene.

* Jan van Eyck (sirka 1390-1441)
Skilderij ‘Profeet Micha’

Gloeiend hjit waard doe syn plak,
mar nei de nacht wie dêr it wûnder:
in beam joech skaad foar syn gerak,
dat Jona koe der net mear sûnder.

Wûnderlik wie it ferrin:
in rûp friet troch de woartels hinne,
wat Jona wie mar min nei ’t sin,
want op ‘e nij stiek him de sinne.

Jona kriich fan God de sin
fan dea en libben, want it wûnder
begûn yn Ninevé, fan min
nei better wie foar elk bysûnder.

* Yllustraasje ‘Jona ûnder de  wûnderbeam’