Archive for the Bibelbylden category

Harkje, liedslju fan it folk,
ministers, hege miters,
ûnrjocht brûke jim as dolk
en stekke ta om fleis te fretten.

Witte moatte jim wat rjocht
is, mar jim snoade wetten
hawwe ’t folk yn lijen brocht,
de kweade opset sil jim spite.

Jim ferdraaie wat is goed
en helje oer de nekke
’t fel, sa komt it folk yn noed,
it kin om jim part hjoed ferrekke.

Strûpe kinne jimme wol,
it fleis is goed te iten,
liven reitsje barstend fol,
want sa ha jimme ’t rjocht ferfretten.

Hear ik dêr in fromme rop
fan folle hege miters?
’t Antwurd is: it near derop,
jim takomst sil de Iene brekke.

* Yllustraasje ‘Micha, lytse profeet, grutte krêft’
Bible Space Vlaanderen

Sil ik jim sizze wa’t nachts wekker leit?
De rike, mar net om syn lijen,
hy is inkeld wach op wat de hertslach seit:
do hast de macht om mear te krijen.

Ik sis jim hoe’t soks yn de moarntiid giet:
de riken stelle landerijen
en mei de huzen is ’t itselde liet,
se ha de macht om mear te krijen.

Sil ik jim sizze wat de Iene seit?
De riken sille net ûntkomme
oan rampen, want dat is de ein fan ’t pleit,
har liet is dan foargoed ferstomme.

Ik set foar jimme yn in liet fol spot:
De tiid hat west foar falske riken,
har lân en huzen treffe ’t selde lot,
de swalkers sille dêrmei strike.

* Mozayk ‘De profeet Micha’
yn de San Marko te Fenetië
(12^e-13^e ieu)