maart 27, 2019
fan Nikolai K. Bodarevski*
As kening ha ik mear te sizzen
as gûverneurs yn dit Romeinske ryk,
dêrby komt noch it grutte foardiel
dat ik de wetten fan de Joaden ken,
dus kin ’k ferbinings lizze.
By Festus wie ik op besite,
myn leave sus Bernice giet dan ek mei…
it folk stiet gau klear mei in oardiel,
mar sa’n relaasje falt wol te besjen,
it hat my noch nea spiten.
De gûverneur liet gau al witte
dat hy mei Paulus yn de knipe siet…
gjin joadske kennis is in neidiel,
it is mar goed dat ik dy wetten ken
om foar en tsjin te mjitten.
Dy Paulus kin syn wurdsje sizze
oer dea en libben, Jezus libbe wer,
wat wie foar ús it grutte foardiel,
want wa’t dat leaude, gie net mear ferlern…
’t ferbân koe ik net lizze.
Myn oardiel ha ik witte litten:
ûnskuldich, mar wol nei de keizer ta.
* Nikolai K. Bodarevski (1850-1921)
Skilderij ‘Ferhoar fan Paulus’
maart 23, 2019
fan Rembrandt*
Mei myn beneaming kriich ik al
te meitsjen mei in arrestant
dy’t twa jier op in útspraak wachte,
Felix koe dêr neat mei wurde,
hat my foar dat karke spand.
De Joaden spilen slim de rol
fan klagers, hy soe harren wet
net holden ha en dus ferachte;
Felix koe dêr neat mei wurde,
hat my foar de útspraak set.
Ik stelde foar Jeruzalem,
de joadske stêd om rjocht te dwaan
oan Joaden dy’t ek wachte hiene;
Paulus woe dêr neat fan witte,
koe syn eigen slach slim slaan:
‘As boarger ha ik ek in stim,
bin mear as inkeld arrestant,
berop my dêrom op ’e keizer.’
Wat koe ’k oars as witte litte:
‘Fan de keizer wurdsto klant.’
* Rembrandt (1606-1669)
Skilderij ‘Paulus skriuwt brieven yn de finzenis’