maart 6, 2019
fan ûnbekend*
Foar de tiid koe ik net witte
hoe’t myn taspraak rinne soe,
fan Jeruzalem gie ’t nei Damaskus,
as bline koe ik fierder sjen
en ha de wrâld it boadskip witte litten.
Troch myn taspraak kaam rebûlje,
om’t it folk net hawwe woe
dat ik it heilryk boadskip brocht,
myn wurd gie yn ’t geraas ferlern…
wêr koe ik foar de gaos eins noch skûlje?
Nearne, want de swipe drige,
wat fansels net heve koe,
omdat ik fan ’t begjin ôf boarger bin
fan Rome, ’t wie wol te foarsjen
wat ik as finzene te hearren krige.
Foar de tiid hie ik it witte
kind hoe’t alles rinne soe,
want de Hege Rie moast him útsprekke.
Ofbylding ‘Paulus’
Mozayk yn Rome
maart 2, 2019
fan ûnbekend*
Ik hie him oansjoen foar in terrorist,
de lieder fan wol fjouwertûzen
striders út Egypte wei,
mar sels in kolonel út Rome mist
somtiids krusjale ynformaasje.
It skeelde neat of ’t mantsje hie der west,
sa neatich wie er tusken tûzen
Joaden, dy’t yn ’t wylde wei
him sloegen, want sa hiene se de pest
oan him; de opskuor rôp om faasje.
Myn mannen ha it mantsje rap ûntset
en moasten him sels fierder drage
nei’t er yn de boeien slein
wie, want ik moast my hâlde oan de wet,
mar ’t rûn úteinlik út op graasje.
It wie in Joad, sels boarger fan ús ryk,
dus moast ik yngean op syn fragen,
ha him fan ’t arrest ûntslein;
hy woe in taspraak hâlde, dat fersyk
ha ’k tastien sûnder argewaasje.
* Yllustraasje ‘Paulus hâldt in taspraak yn Jeruzalem’