oktober 2, 2019
fan ûnbekend*
Do hast fan my it boadskip krigen
oer de lospriis fan ús Hear,
dat wy beholden wurde,
dêrmei bist noch net klear,
it komt ek oan op dwaan en bidde.
In man sil net mei rúzje drige,
hat gjin grime as er bidt,
hy moat syn hannen heevje
en witte hoe’t it sit
mei ’t eigen suver dwaan en litten.
In frou bliuwt dimmen, mei net stige
boppe manlju út, sy heart
allinnich ta te harkjen;
har gouden sier bedjert
it bidden, froulju kinne ’t witte.
Mar Paulus, beide binne skepen
as lykweardich op elk mêd;
de man kin it net litte
de frou te hearren rêd
mei ’t wurd en fierder… lit mar sitte.
* Yllustraasje ‘Frou mei sieraden’
Part fan it Fausta-fresko yn Trier
september 28, 2019
fan ûnbekend*
Oan Timoteüs, myn soan yn ’t leauwe,
fan Jezus Kristus’ boadskip wis;
fan Paulus, roppen troch de Hear,
dêrfoar hie hy it mis.
Wreed ha ik de kristenen ferfolge,
mar Kristus is oan my ferskynd,
dêrnei wie ’k foar syn boadskip klear,
wat men dêr ek fan fynt.
Witst, Timoteüs, dat ik dy frege:
‘Wolst langer bliuwe yn de stêd
om tsjin te gean de falske lear,
dy’t faaks it oars wol rêdt.’
It binne learaars dy’t de wetten
ferkundigje op har manier,
se snappe ’t sels net, jouwe kear
op kear har wurd foar wier.
Dus, Timoteüs, ferbied har fabels,
do witst wol, it is praat-fan-neat,
wy binne mei dat boadskip klear,
it is ta leechte keard.
* Ikoan ‘Timoteüs’