oktober 9, 2019
fan Caravaggio*
Do witst wol, God hat alles skepen,
dus wat út syn wurd kaam, dat is goed,
wêrom soest it dan fersmite?
Tankje God foar wat Er jout,
dan kinst it op syn wurd goed ite.
Nei leagensprekkers moatst net harkje,
want skynhillich bringe sy de groet
en ferbiede dan guon spizen
dy’t God jûn hat as fertroud,
syn wurd sil dy de wei wol wize.
Dan libbest út ’e wurden fan
it leauwe, wat foar ús itselde is
as goed ite en ek drinke;
’t geastlik miel dat Kristus jout,
silsto dan ek oan oaren skinke.
* Caravaggio (1571-1610)
Skilderij ‘De Emmaüsgongers’
oktober 5, 2019
fan Giuseppe Franchi*
Bestjoere is gjin lichte taak,
mar de gemeente kin net sûnder
bestjoerders dy’t dat kinne,
dêrom is ’t in goede saak
dat sy har dêrop djip besinne.
In foarman jout goed ûnderrjocht,
hy libbet sober en bysûnder
ynskiklik, evenredich,
earber, nochter en oprjocht,
hy is ’t yn dwaan en litten sedich.
Dat giet ek foar diakens op,
foar foarlju dogge sy net ûnder,
sy ha in skjin gewisse,
rinne net mei in heech krop
en kinne foar in oar wat misse.
Foar beide jildt in goed bestjoer
oer eigen frou en bern, foar wûnder,
jawis, dat moat dochs kinne?
Froulju geane op ’e toer
fan trou, ’t moat dêr úteinlik hinne.
* Giuseppe Franchi (1565-1628)
Skilderij ‘Paulus’