De Iene seach de wrâld yn ’t rûn
en liet syn grime hearre:
‘De folken bûge ’t rjochte krom,
foar harren is de tiid ferrûn…
sprek do har oan, profeet,
de tiden troch
en draai it ûnrjocht om,
it kin no noch.’

De godsman Amos krige weet
fan ’t ûnheil foar de folken
en profetearre yn it rûn:

‘Dit hat de Hear te sizzen:
Om it kriichsgeweld yn Syrië
sil Ik de dieders leech- en straf oplizze.
Om it fjurjen yn de Gazastreek
sil Ik de dieders leech- en straf oplizze.
Om de kampen yn hiel Libanon
sil Ik de dieders leech- en straf oplizze.
Om de muorregrins yn Israel
sil Ik de dieders leech- en straf oplizze.’

De godsman Amos seach frjemd op
fan ’t ûnrjocht fan de folken
en profetearre yn it rûn:

‘Dit hat de Hear te sizzen:
Om de drinkeldeaden troch Europa
sil Ik de dieders leech- en straf oplizze.
Om de negermoarden yn Amearika
sil Ik de dieders leech- en straf oplizze.
Om de oarlochsdriging fan de Russen
sil Ik de dieders leech- en straf oplizze.
Om de …’

* Ikoan ‘Profeet Amos’

Tekóa, doarp by de woestyn,
dyn namme waard bekend,
want Amos wenne yn dyn oard,
oan ’t boerelibben wend.
Fier wiesto fan de keningsstêd
mei foarst Jerobeäm,
syn rykdom wie rûnom bekend,
mar dôve wie de flam.

God rôp doe Amos ta de die,
by skiep en figen wei,
hy moast op wei mei ’t wurd dat God
him yn de mûle lei:
‘De Heare brinzget as in liuw,
syn lûd klinkt oer it gea,
de greiden lizze toar en feal,
de berchtop eaget dea.’

Doe bûgde Amos nêst syn skiep
de holle nei de grûn,
want as profeet moast hy it dwaan
mei wiisheid troch God jûn.
Wa’t wiisheid mingt mei ’t fjurrich moed,
sjocht by gjin kening op,
syn hert rint oer fan hillich fjoer,
oer ’t gea klinkt lûd syn rop.

De wierheid hie in skelle stim:
‘It is in grut skandaal,
ûnskuldigen ferkeapje jim
foar twa kear in sandaal.
Jim slaan it jild yn stinzen op,
fertsjinje sels gjin stoer,
mar klauwe ’t yn mei swier geweld,
jim misdied is moarn oer.’

Mar oan de ein wie Amos’ lûd
fol fan in kommend heil:
‘Oer is de neare ballingskip,
God bringt syn folk op ’t peil
fan kening Davids hoederskip,
de greiden wurde grien,
de berchtop dript fan druvesop,
sjaloom foar elkenien.’

* Russyske ikoan ‘Profeet Amos’