Hoe’t de rúzje is ûntstien,
de striid him sa ûntwikkele,
wit de heit en oars gjinien
as Ivan de Ferskriklike.

Hy de tsaar, de oar syn soan,
ek Ivan, de ynskiklike,
wie bestimd foar troan en kroan
nei Ivan de Ferskriklike.

Tsaar en heit, dat wiene twa,
de tsaar, troch macht fernikkele,
sloech mei stêf en grime ta
as Ivan de Ferskriklike.

’t Oansjen koe de heit net ha,
it kleed, troch fuotten ribbele,
glied er raar oer út en sa
is Ivan foar him knibbele.

Soan en heit, yn namme ien
en ek fan siken en fan bloed:
‘Myn jonge, wat ha ‘k dien?’
‘Mar heit, it komt wol goed…’

* Ilja Repin (1844-1930)
hat it skilderij ‘Ivan de Ferskriklike
en syn soan Ivan op 16 novimber 1581’
skildere mei de bedoeling it minsklike
drama fan de tsaremoard wer te jaan:
de reaksje fan heit en soan.

Ik, skilder Van Ostade,
stean dêr mei de hân op ’t hert,
ferklearje dat jim aarden
my befoelen, lykwols net
jim uterlik, it rûne
dat ik fêstlei yn ’t portret,
jim stal wie as in tûne,
‘k ha it ek yn brieffoarm set.

Ik bin in keunstneresse,
Katharina, sa hjit ik,
en hoech gjin sêfte kessens,
want myn billen binne dik,
ik dichtsje sterk mei wille,
jou sa no en dan in tik:
de skilder kin ik tille
op papier en soks skriuw ik.

Ik bin har âldste suster,
ha de wierheid yn de hân,
wy binne net fan juster,
hjoed soe ’t heve, sei myn man:
jou keunst de earste eare,
foaroan yn de breedste stân,
sa komt it foar de hearen,
froulju kinne der wat fan!

* Adriaan van Ostade (1610-1685)
hat famylje De Goyer – skout Hendrik,
syn frou Maria en syn skoansuster
Katharina Questiers skildere tusken
1650 en 1655, wat bliken docht
út de hearskjende (klean)moade.