juni 21, 2024
fan ûnbekend*
It libben is lykas in wei
dy’t elkenien ôflizze moat,
it giet mei faasje yn ’t begjin,
de ein telt mannich stroffelstien,
wa’t trochset, treft it net sa min.
Sjoch Fortaleza Canyon,
it paad dêrhinne liket flak,
mei faasje giet it yn ’t begjin,
mar mei it tempo is it dien
wannear’t men amper rinne kin.
Wa’t trochset, krijt perfoarst gjin spyt,
sjocht ûnder him syn libben wer:
de stream krijt ûnderoan frij baan,
eroazje djippet út de kleau…
it útsicht sil foldwaning jaan.
* Foto ‘Fortaleza Canyon yn Brazilië’
juni 20, 2024
fan ûnbekend*
Ezechiël
De Heare stiek Gog yn de holle:
‘Ik tsjoch op tsjin Israel,
it lân dat samar iepenleit,
ik kom dat folkje oer it mad,
dat fredich wennet sûnder muorre,
‘k sil goud en sulver plonderje,
want wêr is harren God?’
De Heare brânt fan leafde foar syn
folk, fan grime foar foarst Gog,
dy’t trillet fan it skodzjen fan
de grûn fan Israel lykas
de fisken, fûgels, wylde bisten
en alle minsken yn it lân,
de striid brekt dan ek los.
Gog krijt de heilbui op ’e holle,
fjoer en swevel komme del,
wat alles oer Gods rjochtdei seit,
mei pest en bloed ferrint Gogs lot.
* Foto ‘Heilbui’