Willem Tjerkstra’s thússide
admin

Humoristysk skilderje

Keunst

fan ûnbekend*

Sjedêr, it dûbelskilderij
hâldt skôgers foar it lapke
tsjûge it papierke ûnder ’t boek,
de skilder sjocht ús earnstich oan,
dochs hâldt hy fan in grapke.

Hy skildere op ien paniel
himsels mei boek en pipe,
ek de roede fan in grien gerdyn,
it koste him wol enerzjy,
syn humor hat him stipe.

De skilder hat de put derút
en wol him no ûntspanne
mei syn pipe en in spannend boek,
dus ticht of iepen dat gerdyn?
Foar him sil ’t derom spanne.

* Gerard Dou (1613-1675)
Skilderij ‘Selsportret’




admin

Utlis oer machtige riken

Bibelbylden

fan Rembrandt*
Daniël

Ingel Gabriël,
boadskipper út ’e himel wei,
wie roppen om op ierde
út te lizzen wat de raam en bok
betsjutten foar de takomst.

Dêr lei Daniël
langút, kjel wurden troch de komst
fan Gabriël op ierde,
daliks holp hy Daniël oerein,
liet him de takomst witte:

‘De raam hie op ’e kop twa hoarnen,
hjir binne mei bedoeld
de keningen fan Medië en Perzië,
machtich wurde harren lannen.

De bok mei ien hoarn koe goed stjitte:
de foarst fan Grikelân
dy’t sterker wurdt as Medië en Perzië,
dochs moat hy it sitte litte.

Dan komme fjouwer keninkriken,
dêr’t ien fan machtich wurdt,
mei grou geweld ferrinnewearret hy de wrâld,
elkenien moat foar him wike.

Syn macht wurdt troch de himel brutsen,
dus net troch minskehân,
hâld, Daniël, dit fisioen mei soarch foar eagen,
hjirtroch hat de Heare sprutsen.’

* Rembrandt (1606-1669)
Skilderij ‘Gabriël leit it fisioen út’

Archieven

Zoeken

  • Categorie

  • Datum