augustus 23, 2024
fan ûnbekend*
Rin mei troch Ubud dêr’t kultuer
oeral foar master opslacht,
dirigearjend de toerist
fan galerijen nei musea…
de fraach is wat er mist.
Rin Ubud út, de strjitte giet
dan oer op ’t paad de hichte
yn, de rêst fan de natoer
sprekt oan mei ’t liet fan griene fjilden,
de stilte is net djoer.
De hichte tilt it libben op,
fier boppe de matearje
út, lykas in fûgel fljocht
oer dizze mikrokosmos hinne…
it mist net wat er sjocht.
* Foto ‘Ubud op Bali, Yndonesië’
juli 19, 2024
fan ûnbekend*
fan ûnbekend**
In brêge soarget foar ferbining
tusken dit en dat gebiet
om te kommen wêr’t men wêze wol;
de brêge nei in fier ferline
leit yn ’t hege noarden.
De oarde dêr’t de wylde Wytsing
boude mannich drakeskip
om te rôvjen, alle boaten fol,
sprekt hjoed ek noch fan it ferline:
byld of yn ferbylding.
Foar eagen komt it Noarske lânskip:
bergen, fjorden, net te min,
dêr’t men as toerist graach wêze wol;
kom oer de brêge nei ’t ferline:
wylde Wytsings oarde.
* Foto ‘More og Romsdal yn Noarwegen’
** Foto ‘Wapen fan More og Romsdal’
