Archive for the Skiednisbylden category

Rûn de spanning op yn ’t lân
troch arrogânsje fan reginten,
dan seach ’t folk út nei Oranje,
hielendal net op ‘e sinten.

Dûnsjend gie it nei de kroech,
want hjoed woe ’t folk de jierdei fiere
fan it jonkje fan Oranje**
en fansels ek om te klieren.

Kroechbaas Geurt mei swurd en drank
gie op ‘e knibbels foar syn gasten
en fansels ek foar Oranje
foar’t se troch de tape hosten.

Jan, syn twadde namme Steen,
stie justjes wankel op ‘e fuotten,
brocht in toast út op Oranje
wylst er mei reginten spotte.

Oer ’t balkon hong Wobbes broek,
hy rêde ’t better yn it neaken
mei syn Wimke fan Oranje,
want dy kleur wie him ta beaken.

** Willem III waard tsien jier

 * Jan Steen (1626-1697)
Skilderij ‘Prinsedei’ (14 novimber)

Wat docht in stêd mei smiten jild,
sâltswiet fertsjinne yn de heale wrâld?
Reginten sochten ’t yn in sprekkend byld:
heechbrede bou yn mannichfâld.

’t Gebou moast stean de ieuwen troch
mei fjirtjintûzen peallen yn de grûn,
sa stiet it wûnder hjoed de dei der noch,
foargoed oan daam en Amstel bûn.

It achtste wûnder fan de wrâld,
it Europeeske sieraad sûnder mear,
bestân tsjin waar en wyn en ek tsjin sâlt
fan see, dy’t drige mannich kear.

It middelpunt fan it hielal,
sa’t Vondel ha woe yn ’t jûchhei-gedicht
fan fjirtjinhûndert rigels, boppe-al
moast komme ’t wûnder yn it sicht.

* Gerrit Berckheyde (1638-1698)
Skilderij ‘It stedhûs op de Dam yn Amsterdam’
Skilderij ‘De Dam mei Stedhûs, Nije Tsjerke en Waach’