april 30, 2017
fan ûnbekend*
fan ûnbekend**
Victoria, de froulike fiktoarje,
keninginne fan it Britske ryk
oer alle parten fan de wrâld…
wa wie oan dizze frou gelyk,
koe ien har noch feroarje?
Sy waard net yn de keningswidze berne,
bleau allinnich, wie as iennichst bern
wol foarbestimd foar troan en kroan;
oan njoggen bern wie ’t wol te sjen,
sy liet har, iennichst bern, net kenne.
Har bern en bernsbern liet sy rûnom trouwe,
dat sy waard Europa’s beppe neamd
en keninginne fan de wrâld,
it Britske bloed hat oeral streamd
wêr’t hannen kamen út ’e mouwen.
Foarútgong wie it biedwurd yn har jierren,
ûnder stroom kaam ’t wurk yn elk fabryk,
fiktoarje fluite ek de trein,
mar wa’t doe earm wie, waard net ryk,
Victoria seach dat fan fierren.
Nei trijensechtich jier as keninginne
fan it Britske ryk en ek de wrâld,
liet sy matroazen nêst har rinne.
* Foto ‘Keninginne Victoria’
** Foto ‘Begraffenis fan keninginne Victoria’ (1901)
april 23, 2017
fan ûnbekend*
Troch âlde tiden hinne
streamden foarmen fan kultuer
troch Rome, stêd dy’t stiet model
foar keunst fan lange duer,
ek hjoed de dei yn tel,
sa’n stream sil nea ferrinne.
Troch alle tiden hinne
streamde wetter troch de stêd:
de Tiber as in godsrivier
rûn stadich yn it bêd,
ek rap as ’t wylde dier
om sa in proai te winnen.
Wol fyftjin meter heger
hat it wetter ien kear stien,
in ramp, dêr kaam it doe op del;
it bist friet oan de stien,
de tosken yn it fel
fan ’t kulturele leger.
Sjedêr ’t Romeinske Foarum
mei it wetter oan de foet,
twa streamen botsten opinoar,
in tredde stream fan bloed
brocht Rome yn de war,
de stêd ferlear dekoarum.
Foto ‘Oerstreaming fan it Foarum yn 1900’