maart 3, 2019
fan ûnbekend*
fan ûnbekend**
As beuker boude hy mei ’t spul
fan Fröbel, rjochte streken
stadichoan de hichte yn,
net heger kaam it as de mul,
it each seach der mei nocht op del…
syn beukerbou as teken.
Doe’t hy yn ’t libben healwei wie,
socht er in oare rûte
mei in frou dy’t hy wol koe,
foar him de moaiste foarmen hie,
mei beide bern fermoarde waard…
troch leechte die er boete.
Sa tusken grûn en leechte yn
fûn hy syn ynspiraasje,
boude tichtby de natoer,
dêr’t wetter falt en rûzet wyn,
as Fröbel-blokken, út ’e wel
fan doe… ferdivedaasje.
* Foto ‘Frank Lloyd Wright’
** Foto ‘Fila Fallingwater’
februari 24, 2019
fan ûnbekend*
fan ûnbekend**
Mark Twain en Haley de komeet,
in twaling dy’t hjir kaam en gie;
de skriuwer hie it krekt foarsein
en heakke oan syn wurd de die:
doe’t Haley wer kaam, stoar Mark Twain.
Hy wie de sechde fan sân bern,
mar trije bleauwen derfan oer
doe’t hy noch mar in jonge wie,
hy preau yn ’t libben swiet en soer,
gie troch, hy hie ’t tsjin Haley sein.
De Mississippi wie de stream
dêr’t hy as stoomboatloads op foer,
wat him de ynspiraasje joech
foar reizen hiel de ierde oer,
syn wurden streamden út ’e die.
De wurden kamen op papier:
Tom Sawyer, Huckleberry Finn
hat hy in spannend libben jûn;
syn eigen hie in min ferrin
op ’t lêst: de trystens dy’t swier woech.
Doe’t Haley wer syn sielsmaat fûn,
hat Twain oan him syn siken jûn.
* Foto ‘Mark Twain’
** Omslach “The adventures of Tom Sawyer’