januari 4, 2025
fan ûnbekend*
fan ûnbekend**
In minskelibben as gedicht,
sa docht it him wol foar
as men weromsjocht op ’e tiid
mei alle ûnderfinings
dy’t weromfûn wurde yn it koart,s
lykas gedicht, it libbenspoar.
In dichter, amper hjir bekend,
beskreau it libben as
gedicht, syn eigen, ek de tiid
dêr’t hy mei folk yn libbe
dat him ûnderfinings skonken hat,
sa makke ien al ’t oare los.
De dichter skreau syn libben lang,
wat lei him oan it hert,
dat wolris stûke troch de tiid,
mar ’t kloppe troch foar prachtich
Paterson, in lang gedicht as paad,
hy hat syn stappen dêrop set.
* Foto ‘William Carlos Williams’
** Foarkant ‘Paterson’
december 29, 2024
fan ûnbekend*
fan ûnbekend**
It barde yn itselde jier:
de earste proef tichtby Bikini,
de twadde yn mondên Parys
mei twa eksploazjes as gefolch,
de ynfloed dêrfan rikte fier.
Bikini, ’t eilân mei koraal,
seach earst noch skoan de sinne skinen,
ynienen kaam in poddestoel
dêrfoar, ’t gefolch wie eksplosyf,
de hege wolk spriek kleare taal.
Bikiny twa, in oar ferhaal,
woe ha de sinne moast wol skine,
net yn Parys, mar boppe ’t strân
mei tal eksploazjes as gefolch,
de moade die in hiele haal.
De proeven rikten beide fier,
it wie gjin striid om fier te kommen,
mar hokker brânde op ’e hûd
mei watfoar sykte as gefolch?
Bikinys wiene foar de sier.
* Foto ‘Atoomproef by Bikini’
** Foto ‘Yn bikiny’
