mei 4, 2024
fan ûnbekend*
Wês jûn twa minuten stil
om efkes ôf te wêzen
fan de praters op it skerm
dy’t har sjen en hearre litte
oer in algemiene term.
Wês jûn twa minuten stil
om nei it lûd te hearren
fan sirenes oer de stêd,
wer alarm foar Oekraïners,
ûnderweis of krekt op bêd.
Wês jûn twa minuten stil
om ’t gûlen op te heinen
fan de bern út Gaza wei,
dy’t al lang yn lijen sitte…
is foar har moarn wer in dei?
Wês jûn twa minuten stil
om nea wer ôf te wêzen
fan de rop fan Joad en sy
dy ’t foar de frijheid strieden…
nei acht swiere slaggen: swij!
* Foto ‘Flagge healstôk’
april 30, 2024
fan ûnbekend*
‘America first!’
Sa hat de rop al iuwen klonken
fan it folk fan USA:
‘Wy binne ’t bêste lân op ierde,
mei oaren gean wy net yn see!’
‘America help!’
Sa klonk it troch de jierren tritich
hinne, Roosevelt wie ree
om Churchill út ’e brân te helpen,
Amearika stiek mei oer see.
‘America send!’
Sa klonk de gjalp út Oekraïne,
Biden woe wol, hat it wûn
Zelensky út ’e brân te helpen,
Amearika hat wapens jûn.
‘America first!’
Sa klinke op ’e nij de lûden
fan it folk fan USA
mei Trump as arrogante balter:
‘It bêste lân bliuwt op syn stee!’
* Foto ‘Flagge fan USA’