juni 1, 2024
fan ûnbekend*
De Noardsee siet dertusken,
tusken stilstean of der fol foar gean
om mei in fracht oan wapens
fijân Dútslân te ferslaan,
de frijheid wie de muoite wurdich,
mear noch: ek de dea fan de soldaat,
it wie mei sizzen net te dwaan.
Hoefolle wurden sprieken
fan de stipe foar in folk yn need,
allinnich mar mei wapens
sûnder Ruslân te ferslaan?
Lang siet de grins dertusken,
tusken stilstean of der fol foar gean
mei wapens dy’t fier rikke
om ús freonen lucht te jaan,
de frijheid giet oer grinzen hinne
mei rjochtfeardichheid as trouwe maat,
tegearre moatte sy it dwaan.
* Foto ‘D-Day’
mei 25, 2024
fan ûnbekend*
Gjin folk dat leaut as Israel
de iuwen troch yn mar Ien Rjochter,
heech ferheven op ’e rjochterstoel,
it jout him nei syn útspraak del.
De Rjochter sprekt dat folk faak oan
mei frijspraak of mei ’t strange fonnis
fan de jierren troch yn ballingskip,
heech siet de Rjochter op syn troan.
It folk striidt hjoed de dei mei fjoer
moarddiedich tsjin de Palestinen,
ballingen yn ’t eigen brutsen lân,
de Rjochter slacht it diskear oer.
Mar net de rjochters yn De Haach,
dy’t har oer Israel útsprekke
as de naasje mei ekstreem geweld…
bekeart dit folk him, bliuwt de fraach.
It is de fraach oft Israel
noch leaut yn ’t fonnis fan ien Rjochter
of beset it sels de rjochterstoel
en sleept it noch mear nei de hel?
* Foto ‘Fredespaleis’