Archive for the Lyrysk Deiboek category

De namme spriek it fielen út:
dit paradys wie like moai
as ’t hôf fan Eden yn ’t begjin
dêr’t op ‘e wrâld de earste tút
kreëarre foar dy twa de toai:
natuerlik libben as de sin.

Se bloeiden tusken reid en gers,
belibben hazze, ree en mol
en fleagen fûgels achternei,
wat kulminearre yn in fers,
twastimmich, fleurich, fol
gefoel, har hiele skeppingsdei.

De jierren telden nei de dei
dat wurd en sifer leine fêst
wat har op ’t lêst foar eagen stie:
hy skreau it leaf ferline nei,
dit paradys hie no wol west,
de bernsbern mar, sa wie har rie.

En doe’t it stiel wat tinner waard,
it griene hout op plakken keal
en ’t daklear net mear sa fertroud,
ha bernsbern meiinoarren praat:
gjin stiel mear, mar it wurdt in steal
fan no ús tiid: beton en hout.

It paradys fan stiel en hout
foel útinoar, it wie de ein,
mar net foar ’t pear fan styl en sang:
sy fierden feest, sa lang al troud
oerlibben sy wat lei ferslein,
har paradys wie libbenslang.

‘Ik protestearje tsjin jim gluorkjen,
deleagjend út ‘e fûgelhut!’
De swarte krie fleach krassend fuort
om by de ekster noch te buorkjen.

‘Myn tank dat jim allinnich seagen,
úthelje wie gjin sprake fan!’
De wylde ein swom sûnder man,
brocht wol sân piken oer de weagen.

Wat soe in gluorker oars dwaan kinne
as rinne nei de fûgelhut:
de dop as relikwy fan nut
foar sjoggers dy’t der nei him binne.