Archive for the Keunst category

Hoefolle jierren hie Repin
har oan de Wolga bealgjen sjoen?
Hy dronk it byld as wodka yn
foar ynspiraasje, foarm en tint:
de rige dy’t foaroerbûgd rint,
in byld dat himet, kreunt en stint.

Se pakten alle dagen ’t tou
dat flokte mei har frije geast,
út solidariteit kaam trou
de beage op ‘e skeinde hûd
en raffellapen op ‘e foet
fertelden fan har moed yn noed.

Hoefolle byldkrêft joech Repin
oan alve manlju yn de skrep?
De wize lieding fan Kanin
sleept stil syn ploech de Wolga lâns,
behalve Larka, noch net mâns
genôch, is efkes út balâns.

* Ilja Repin (1844-1930) wurdt wol
de Rembrandt fan Ruslân neamd.
Hy hat de Wolgaslepers observearre
en fan 1870 oant 1873 oan dit
ûnderwerp wurke.
Hy woe mei it skilderij de fysike en
geastlike krêft fan de slepers werjaan.

Hy hie it minder treffe kind
as learling fan de grutte master
Rembrandt, wiid en siid bekend,
beseach er ’t fallen fan it ljocht
dat trochkrong yn it tsjuster,
mar dochs, hy wist it noch net rjocht.

‘Myn freon, ’t alles vanitas
sa’t Preker it de Joaden learde,
dêrom lit it libben los
dat fûl tsjin fijâns findel focht,
sjoch ien kear noch nei juster,
set vanitas yn ’t skrille ljocht.’

De Poorter liet syn kinnen sjen
yn harnas, oarlochsbút en findel,
de matearje giet ferlern,
sjedêr de man dy’t rúzje socht,
leit as skelet yn ’t tsjuster
en brutsen falt it wiffe ljocht.

‘Myn freon, ’t gehiel is net sa min,
betink lykwols wat ik dy learde:
’t libben hat in djippe sin,
want sjoch it bern yn ’t folle ljocht,
wylst hoeders, ’t paad earst bjuster,
ha him har sljochte earbied brocht.’

* Willem de Poorter (1608-nei 1648)
krige syn oplieding yn it atelier
fan Rembrandt yn Leiden.
Hy makke, lykas syn master,
in tal skilderijen mei bibelske tema’s.