Archive for the Keunst category

Yn de spegel fan it keunstwurk
sjocht men krêften fan de geast,
dy’t as in lânskip ljochtet,
yn de middei noch it meast.

Fan de skilders observaasje
kaam syn stimming op it doek,
al like ljocht as wetter,
heinend kleur yn foarmen tûk.

Want hy wie de fiere fisker
en de ruter tichterby,
de einen oan it swimmen,
yn de pont de steande kij.

Pontbaas woed er ek wol wêze,
farrend spegel wrâld oan wrâld,
syn krêft, ferbûn mei wetter,
brocht er oer sa mannichfâld.

Sjoch hoe’t hjoed de dei de pontbaas
krêften sparret by it stjoer,
syn geast fjocht op it ronken
fan de motor hastich oer.

* Esaias van de Velde (1590/1591-1630)
is yn Amsterdam berne en waard as
tweintichjierrige skilder yn Haarlem,
de stêd fan Frans Hals.
Troch observaasje koed er de atmosfear
fan in lânskip op it doek oerbringe.

Hy makke al dy fiere reis
nei skilder Michelangelo
en learde yn de keunst wat nijs:
hoe sjochst it deistich libben no
sa as it is, gjin moaie plaat,
mar ’t bleate lichem yn it read,
de minske tusken ljocht en skaad,
dat hat ús skilder Hendrick leard.

Hy streke Markus op it doek
dy’t, ynspirearre troch de geast,
syn evangeelje skreau yn ’t boek,
fol tearen, yn ’t gesicht it meast,
mei ’t each op ’t libben en de dea,
de liuw as maat, symboalysk bist,
dat sa belibbe Markus ea
syn Master, dy’t er libben wist.

De evangelist Markus
fan Hendrick ter Brugghen**

* Michelangelo (1475-1565) wie
in Italiaanske skilder, byldhouwer,
boumaster en dichter.
Hy skildere it persoanlike fan de minske.
Earst waard syn wurk net wurdearre,
om’t it maniërisme (it ideaal werjaan)
de keunststyl fan dy tiid wie.

** Hendrick ter Brugghen (1588-1629)
wie in Nederlânske skilder, dy’t tsien jier
yn Rome wenne. Hy folge as ien fan de
earsten yn ús lân de natuerlike styl
fan Michelangelo nei.