mei 15, 2025
fan Gustave Courbet*
Sy leit net samar neaken,
heal ferburgen achter ’t kleed,
it is net om’t sy oars sa swit,
want hjit is ’t hjoed ek net…
sy spilet bleat foar beaken.
De pappegaai lit hearre
dat er hat har finger beet
en wyld wurdt fan har bleate hûd:
‘Ik ha fan dy ferlet!’
Hy spriedt syn bûnte fearren.
Sa leit sy foar him iepen,
stive fearren by de fleet
foar ’t streekjen fan har glêde hûd:
‘Ik ha fan dy ferlet,
net om al fêst te sliepen.’
* Gustave Courbet (1819-1877)
Skilderij ‘De frou en de pappegaai’
mei 8, 2025
fan Francisco de Goya*
Wa moat it grutste offer bringe?
Wa’t de skiednis sprekke lit,
wit al gau it goede antwurd:
hoe’t sy stiet of leit of sit.
Sy stiet allinnich foar wol fjouwer
dronken, geile keardels oer,
dy’t besykje har te nimmen,
sy beskôgje har as hoer.
Sy sit slim oer har eigen wearde
yn as frou dy’t net krekt wit
hoe’t dy fjouwer har bespylje,
wat sy harren witte lit.
Sy lit har dus net leger lizze
as de manlju ha op ’t each,
bringt gjin offer oan de geilens,
wat de man nêst har al seach.
* Francisco de Goya (1746-1828)
Yllustraasje ‘Wat in opoffering’
Print 14 út ’e searje ‘Los Caprichos’