Archive for the Keunst category

Leien, stêd fan grutte hichte,
dêr’t se rotten ieten as har brea
fanwege honger nei in frij bestean,
hat wolfeart wûn troch wurk en bea,
belibbe lykwols ek de lichte.

Leien makke ’t swiere lekken,
hege kwaliteit út Ingelsk wol,
mar dizze wolfeart hie gjin lang bestean:
de âlde frou har tiid wie fol,
se seach de stedsfaam yn de nekke.

Tiid brocht doe it lichte lekken,
swierich woe se ’t om de heupen ha,
symboalysk foar in fleurich, ryk bestean,
de stedsfaam stiek de hân har ta,
dat Leien koe de wolfeart rekke.

* Izaak Nicolai Swanenburgh (1538-1614)
waard berne yn Leien, wie in perioade
boargemaster fan dy stêd en stoar dêr ek.
Yn 1594 krige er fan it stedsregear
de opdracht om sân grutte panielen
te skilderjen, dêr’t ‘De stedsfaam mei
de Alde en Nije Nearing’ ien fan is.

It mei in wûnder hjitte
dat wy it helle ha,
ik ’t neifertelle kin
oan wa’t noch binne bern,
want trochgean moat men witte:

Fan slavewurk en lijen
is ’t folk foargoed befrijd
om op himsels te stean,
mei mannemoed te gean,
úteinlik rêst te krijen.

Doe’t farao syn leger
ús op ‘e hakken rûn,
hat Mozes stoerd de see,
in paad lei foar ús ree,
de trochgong fierde heger.

Ek farao woe fierder,
ús jeiend achternei,
mar ’t wetter foel werom
en ’t leger kaam sa om,
gjin trochgong weage swierder.

Jim moatte dit noch witte,
hoe’t Mozes ’t letter sei:
‘Net ik ha jimme laat,
it wie Jahweh syn paad
dat trochgong boppemjitte.’

* Nicolas Poussin (1594-1665),
in Frânske keunstner,
skildere literêre en bibelske tema’s.