Archive for the Keunst category

Auvers, in doarp mei wite wenten,
plat, rûch smiten tsjin de hichte oan,
gjin plak foar heechmoed op ‘e troan
en ’t razen fan ferdoarne finten.

De himel sprekt fan wolk en sinne,
’t spul fan ljocht dat nei de delte rint,
dêr’t stilte it fan stappen wint
fan froulju dy’t soks hearre kinne.

Sa’t ingels boppe ’t lânskip sweve,
binne sy de lichte trêden wend.

Dronryp, it doarp yn ’t grien ferskûle,
lytse blokjes, readich as kontrast,
gjin plak foar ’t wenjen fan in foarst
of keardels mei in skerpe mûle.

It loftblau brekt de skiere walen,
struit it ljocht op ikker, skeaf en toer,
it rûzet hjoed it nôtfjild oer
dat froulju gean foar mânske halen.

Sa’t ingels bûgje foar it hege,
dogge sy dat foar de heareboer.

* Camille Pissarro (1831-1903), in Frânske skilder,
beynfloede jongere ympresjonistyske skilders.

De tsjerkeklokken hiene roppen
foar gebed en Kristus’ lea,
op dizze dei it hillich miel,
en wylst de seine komt fan boppen,
rinne sy mei folle siel
wjerkôgjend troch it gea.

Net oars as swart-bûnt yn de jassen,
passend by de kristenplicht…
Marie wie yn it read en giel,
wat net by Kristus’ lijen passe,
koe ’t ek oars, in lege siel
jout faak in bûnt gesicht.

Net iens in kilometer fierder
skuort in frou yn ’t droege hea,
joech krekt noch oan har bern it boarst,
har rispinge, de boer as siedder,
koe in wurkster oars, se moast
wol, wat is goed, wat kwea?

* Paul Gauguin (1848-1903)
waard yn Parys berne en stoar
op ien fan de Marquises Eilannen
yn de Grutte Oseaan.
Hy ûntwikkele in styl mei inkeld
de klam op it wêzentlike.
Skilderij ‘Sicht op ‘e Alyscamps’
Skilderij ‘Frou yn it hea’