Archive for the Keunst category

Gigantysk is de stienkolos
mei tsjokke muorren, treppens, bôgen,
wiffe ljedders dêr’t gjin treppen is;
wa’t hjir ferbliuwt, komt nea wer los,
sa’n tsjerker wurdt as altyd troch beskôge.

It folk dat himet finzen troch,
in klimmen nei it ljocht fan boppen,
dêr’t gjin iepen doar of finster is;
de swierte lûkt sterk oan en sjoch,
de rûts oan touwen is net mear te stopjen.

Wat is in minske yn de trêd
fan ’t libben oars as klimmer, boppe
kommen, dêr’t gjin útsicht foar him is,
wer sakjend yn syn tsjerker, mêd
op ’t lêst, gjin god of neiste te beroppen.

* Giovanni Battista Piranesi (1720-1778)
waard berne yn de omkriten fan Fenetië
en krige syn ynspiraasje fan de ruïnes yn Rome.
Hy makke yn syn libben mear as 1200 grutte etsen.

Mei de eagen ticht, sa stean ik op ‘e hichte,
fiel troch ’t hier de slaggen fan de wyn
en priuw it sâlt.

Troch de teisters sjoch ik dize, hoe’t it tichte
wolketek keart kleare sinneskyn
en ’t wurdt my kâld.

‘k Skuor de eagen iepen, stoarje op ‘e lichte
del en wit, hjir libje ik net yn
as wie ’t myn wrâld.

Mar dan stean ik mei beide fuotten op ‘e grûn,
dy’t oan de lange learzens sûget,
en priuw it swiet.

Ik lûk de wynbrau op en sjoch de wrâld yn ’t rûn,
de poel dy’t mei de boaten noeget
en útsicht biedt.

Myn each en ear ha út ‘e delte hichte wûn:
de wyn, dy’t wolk op wolkbank loeget,
stimt mei yn ’t liet.

* Louis Eugène Boudin (1824-1898)
wie as soan fan in seeman
en skipsjonge bekend
mei see en kust.
Hy skildere op lokaasje.

** Gert-Jan Veenstra (1957-…)
waard berne yn Warkum.
Yn 1984 besleat er om him
folslein ta te lizzen op ‘e
skilderkeunst.
Hy hat syn atelier en galery
yn Offenwier.