Archive for the Keunst category

Sy stie mei beide fuotten op ‘e grûn
en wist wat sy ferwachtsje mocht,
de heale himel kleure ljocht,
de geit hie ryklik molke jûn.

Hy hie ’t gesicht keard nei de reade loft
en seach de fûgels yn de flecht,
hy wist ’t wie wier, it barde echt
mei folle moanne, noch in skoft.

Sy fielde ’t, mar it woe har noch net oan,
’t wie dûbel, yn en bûten har,
sy wist it wol, der wie gjin kar,
’t gefoel fan hjoed, dat barde moarn.

De moanne groeide net, mar bleau in skyl,
wa’t bûten kaam, wie read as bloed,
dat dripte op ‘e linkerfoet,
sy rekke leech, neat waard har diel.

* Marc Chagall (1887-1985)
waard as Mosje Segal berne
yn it hjoeddeistige Wyt-Ruslân.
Hy is bekend wurden troch
syn skilderijen, mozaiken,
glês-yn-lead finsters, keramyk
en muorrekleden.

It ljocht spat troch de kleuren
lykas flitsen út ‘e himel wei,
it is hjoed ljochtskyndei,
mar tsjuster klinkt it seuren:

‘Wy ha al dagen smachte,
sjoch ús bern, sy ha gjin krêften mear,
wêr bliuwt Jahweh, ús Hear,
hoe lang ha wy al wachte?’

Sjoch him dêr heech oprizen,
Mozes dy’t har liedt troch waar en wyn,
sjocht hjoed gjin gat deryn,
de stêf sil it him wize:

‘Ik wiisde jim de paden,
sliet oan flymskerp sân en hurde stien,
dat seach lykwols gjinien,
ik slaan dit fan jim gading.’

Sjoch hoe’t de rots it rinne
lit, in wetterstream yn trijefâld
jout krêft oan jong en âld,
mar Mozes stiet allinne.

Want spat Jahweh syn grime
net yn flitsen út ‘e himel wei?
De klap op dizze dei
is net op kleur te rimen.

* Joep Nicolas (1897-?)
ferlike in glês-yn-lead finster
mei muzyk: in symfony fan kleuren,
ek as men net nei de ôfbylding sjocht.
Dit finster is yn de Alde Tsjerke te Delft.