Archive for the Keunst category

De stilte leit oer ’t simmerfjild,
allinnich kleuren klappe
foar de skientme fan it gea,
wylst fjouwer blommen stappe.

De stream is sakke, leit no stil,
allinnich boaten glide
fierder foar it deistich brea,
yn ’t simmerlân fansiden.

De dyk fiert nei in oare tiid
mei kleuren dy’t meast swije,
fierten nei de hichte skier,
gjin blom kin hjir noch dije.

Twa stâlen stappe sa’t dat giet
yn boaiemleaze tiden,
as de kjeld elk lûkt yn ’t spier,
al moat men dan ek glide.

De stream riist heech en brekt it iis,
de skossen kreakje, klappe
tsjininoar, mar yn it griis
sjocht men al blommen stappen.

* Claude Monet (1840-1926)
wie ien fan de grutste ympresjonistyske skilders.
Skilderij ‘Fjild mei klaproazen by Vétheuil’
Skilderij ‘De wei nei Vétheuil yn de winter’
Skilderij ‘Iisgong by Vétheuil’

Se wie fan jongs ôf boartlik, folle
net genôch yn hân en foet,
want bûten fûn se alles
sa’t it yn har opkaam goed
genôch foar ’t lytse bleate holtsje.

Sy hie fan jongs ôf aspiraasje
foar it wizen mei de hân,
want binnen fûn se alles
wat oerienkaam mei har stân
fan strang it stal mei rjochte graasje.

Se droech de kap fan ‘no moat ‘k leare’,
wiisde mei har finger oan,
wylst moast se bûten keare.

Sy striele út it suver wite,
ûnderwiisde heech fan toan,
moast binnen oan har slite.

* Jean-Simeon Chardin (1699-1779)
wie ien fan de bêste skilders
yn de achttjinde ieu,
dy’t syn skilderijen delikaat kleur joech
en oerstallige eleminten fuortliet.
Skilderij ‘De jonge ûnderwizeres’