Archive for the Keunst category

Dêr sit se dan, myn suske,
fêstbûn oan de stoel,
oars falt se derby del,
en yn de hân de rinkelbel,
it is in stomme boel,
want ik moat op har passe.

Hoe krijt se ’t yn de plasse,
fan dat skelle lûd
krij ik de rinkel yn de kop,
se hâldt ek noait ris op,
ik pak myn hoedershoed
en sil op oaren passe.

Sjoch my as hoederinne,
nó ha ik it drok,
want skiepkes rinne blêtsjend fuort
en as ien oan my skuort,
dan krijt er mei myn stok,
gjin rinkel soe dat kinne.

* Niek Rode (1732-1794)
wie in Deenske rokoko-skilder
fan û.o. portretten.

** Sir George Romney (1734-1802)
krige faak de opdracht om ek de bern
fan syn klanten te skilderjen.

Ik pas net yn in swart portret:
as Frânske keninginne
bin ik op ‘e hichte set,
wat soe my barre kinne?

It folk hat fan de frijheid preaun:
de Frânske Révolúsje,
mar wy binne net ferdreaun,
it hat yn ús fidúsje.

Myn mantsje, kening Loadewyk,
sil oant syn dea regeare:
Frankryk bliuwt in keninkryk,
kin gaos net ferneare.

Ik stek myn finger yn it gat,
wat soe de guillotine
oars as snije yn ’t komplot,
dêr kin ik my yn fine.

Ik pas wol yn ’t portret, mar as
Marije Antoinette,
net in neil of finger los,
wat yngiet tsjin ús wetten.

En as it knypt, dan sis ik: ‘Ho!’
As Frânske keninginne
bin ik ek Madame Veto,
wat soe my barre kinne?

* Rachel Baes (1912-1983)
skildere earst ekspresjonistysk,
dêrnei gong se oer op it surrealisme.