Archive for the Keunst category

Argenteuil ken syn regetta
tusken wenten en de bakboardswâl,
dêr’t amper noch in suchtsje stiet,
elk winsket him in helderol,
mar kin gjin wâl fersette.

Snits syn mar kin sprekken lije
tusken kanten kilometers fier:
’t ferhaal fan fariaasje giet
oer silers yn it spier
troch wyn en geast dy’t frije.

* Gert Jan Veenstra (1957-…),
in Fryske skilder dy’t ferskate kearen
de Snitser mar mei sylwedstriden
op doek set hat.

Koe de snie noch langer lizzen bliuwe
as dat jier yn ’t Finske Noard?
’t Ferfeelde mei de wrâld yn ’t wyt,
mar einlings gie de tiid akkoart
mei tûken dy’t hjoed folop wiuwe.

’t Wie foar har, de dochter mei de namme
Beda, neamd nei beppe, faam
dy’t heal al op ‘e drompel stiet,
sy kriich fan heit it earste laam
as âldste fan de trije fammen.

Koe de snie noch langer lizzen bliuwe
as it om dit wite giet?

Krekt as is dit byld foar har ornearre,
beppe dy’t har dêryn sjocht
as famke op ‘e drompel dy’t
sy nommen hie nei ’t wite ljocht:
in himel ûnder tûzen stjerren.

Koe de snie noch langer lizzen bliuwe
as dat byld foar eagen stiet?

* Hugo Simberg (1873-1917)
wie in Finske skilder dy’t skilderijen makke
tusken Finske folkloare en symbolisme.