Archive for the Keunst category

Maria, Markizin de Pontejos
mei lytse Wjukjewille,
hat harsels yn ’t harnas stutsen, ’t hûntsje los,
mar daliks sil se him wer tille:

‘Myn hûnepûntsje, swierder bisto net,
dus slút ik dy ticht oan myn hert.’

Twa stoere maten fan it plattelân
fermeitsje har mei doggen,
fêst de riemen oan de bân en los de hân
om letter oer dressuer te pochen:

‘Wy sprongen op ‘e hynsterêch en rap
gie ’t fierder, stjerrend wier, gjin grap!’

* Francisco Goya (1746-1828)
Skilderij ‘Maria Ana de Pontejos y Sandoval, Markizin fan Pontejos’
Skilderij ‘Bern mei twa doggen’

Hy hie geniete fan de sinneblom
yn Frankryk, fan de tinten
dy’t de himel jout;
kom dêr yn ’t noarden mar ris om
mei klinten noch fan seadden boud.

Mar doe’t er troch de giele fjilden rûn,
troch ’t libben swier ferwûne,
mei de hel fertroud,
seach hy de sinne op ‘e grûn,
de strielen bûgd as yn de rou.

Noch ien kear kaam it langstme yn him op
nei ’t noarden mei de grauwe
streken fan de bou
dêr’t bodde waard mei bûgde kop:
ferwylge blommen, boer en frou.

* Vincent van Gogh (1853-1890)
Skilderij ‘Stillibben mei sinneblommen’
Skilderij ‘Boeren dy’t jirpels sette’