Archive for the Keunst category

Dêr leit er suver neaken op
it gers, noch jong en dan al faun,
natuerlik is syn libben;
mei it read op pyl en kop
is hy de fjildgod en de clown,
model foar elk oan him besibbe.

En fierderop leit hy, syn maat,
foaroer yn ’t neaken op in stien
te sjen, it kin net misse:
’t is syn lichem en syn aard
as god, mei ’t byld foar altyd ien,
’t natuerlik libben fan Narcissus.

* Magnus Enckell (1870-1925),
in Finske keunstner,
kin beskôge wurde as de liedsman
fan de koloristyske skilders.

In skilderij fan Jacques-Louis,
sa woene kenners optein ha,
de skilder fan Napoleon
op ’t hynder, striidber derop ta,
mar ’t wie in keunstwurk fan Constance Marie.

Mar koe in frou de keunst ferstean
fan Leonardo’s heech berik:
fan skilderij oant loftballon?
Constance Marie sei: ‘Hjir bin ik,
in frou hat each foar mear as siden klean.’

Har skilderij brocht minder op
as dat it wie fan Jacques-Louis,
sa is it wrâldsje fan ‘bon ton’,
mar sjoch de Mona fan Marie…
hat Leo’s Lisa folle kreazer kop?

* Constance Marie Charpentier (1767-1849)
wie in learlinge fan Jacques-Louis David,
de skilder fan ‘Napoleon stekt de Alpen oer’.

* Leonardo da Vinci (1452-1519)