Archive for the Keunst category

Mynhear de presidint,
do sjochst se net, dêr mei har trijen:
mem, har faam en keardeltsje,
sy binne oan de frede wend
mei oerfloed en gitaar,
alhiel gjin lijen.

Madam de Medipom,
do sjochst him net, dêr mei syn eagen,
trije foar sa’n keardeltsje,
hy sjocht net nei jim trijen om
en rekket oars gjin snaar
as bloedspoarpleagen.

Mynhear de presidint,
do sjochst se om dy hinne fleanen:
terroristen, keardeltsjes
oan moard en selsmoardgurdle wend,
mar sjochsto it gefaar…
dy’t neaken steane?

* Louis Buisseret (1888-1956)
wie in Belgyske skilder
dy’t him talei op ‘e klassike keunst.

* Jan Burssens (1925-2002)
wie in Belgyske skilder
dy’t bekend waard mei syn portretten
fan histoaryske en aktuele helden.

It wetter lûkt, de fierte noeget,
lit de paden rinne oer de see,
want ropt dêr net de oare kust
dy’t mear hat as dit keale stee,
dêr’t boer of fisker slaafhurd ploeget.

De trijekleur brûst oer de weagen
fan de Noardsee op Gibraltar oan
en ankeret op ‘e Bosporus;
wannear’t de nacht lûkt nei de moarn,
dan skuorre Friezen grutte eagen.

In kapitein raast rau de mjitte,
wylst de slaven seesâlt switte.

It langstme driuwt, de noardkym noeget,
dêr’t it earste sprietseil boppe stekt,
sjoch fiskers dûnsjen foar de kust
en op ‘e bou, sa is ’t mar krekt,
dêr draaft de boer dy’t fluitsjend ploeget.

Jacob Pietersz van der Croos (1642-1683)
wie in skilder fan lânskippen en seegesichten.