september 12, 2024
fan ûnbekend*
Sjedêr, it dûbelskilderij
hâldt skôgers foar it lapke
tsjûge it papierke ûnder ’t boek,
de skilder sjocht ús earnstich oan,
dochs hâldt hy fan in grapke.
Hy skildere op ien paniel
himsels mei boek en pipe,
ek de roede fan in grien gerdyn,
it koste him wol enerzjy,
syn humor hat him stipe.
De skilder hat de put derút
en wol him no ûntspanne
mei syn pipe en in spannend boek,
dus ticht of iepen dat gerdyn?
Foar him sil ’t derom spanne.
* Gerard Dou (1613-1675)
Skilderij ‘Selsportret’
september 5, 2024
fan Winslow Homer*
As fisker prate hy tsjin fisken,
mar dy seine neat werom,
hoewol’t de bekken iepen stiene,
bleauwen dizze bisten stom.
De trije maten wiene praters
op it lân, soms op it strân,
dêr’t skonken altyd stevich steane,
dêrom bleau har styl yn stân.
De fisker hie genôch fan ’t fiskjen,
hise beide, seil en fok,
hy hie lykwols mar ien pear hannen,
’t wie foar ien man fierste drok.
Seis skonken, likefolle hannen
kamen doe by him oan board,
de maten koene rêstich sitte,
ien hold fêst de fokkeskoat.
De wolken, wyn en hege weagen
lieten harren net mei rêst,
sy waarden stil en moasten hingje,
kreakjend prate doe de mêst.
De fisker, wend oan wyn en weagen,
seach it oan, hold him net stom,
hy prate lykas tsjin de fisken,
mar hy kriich gjin wurd werom.
* Winslow Homer (1826-1910)
Skilderij ‘Oanheljende wyn’