Archive for the Bibelbylden category

Fan syn hichte kaam hy del
by ’t nachtlik wjukslaan fan in ingel
dy’t fersloech syn hiele legermacht;
hy seach de omkear en waard kjel,
mar hold syn keninklike pracht.

Bûgend foar syn heechste god
fernaam er ûnrie yn de timpel,
seach twa fan syn eigen soannen oan
en wist de deastek is myn lot,
de brede macht falt fan de troan.

* Gerard de Jode (útjouwer)
Gravuere ‘Sanherib wurdt troch syn soannen deade’
(Museum Boijmans Van Beuningen)

Laitsje, dochter Sion,
laitsje Sanherib mar út,
want wit, syn tiid hat west;
hy hat de mûle iepenskuord,
syn eagen draaiden nei de loft
fan east nei west, fan noard nei súd,
foar him de ierde, God de rest,
mar grutskens rekket oan de ein
en ierdske machten duorje mar in skoft,
dus wit, foarst Sanherib, dyn tiid hat west;
yn Sion komt gjin pylk of wein
fan dy, want dit is Gods beslút:
de himel slacht dyn leger fuort,
de wei werom hast sels al lein,
lit Sion no mar laitsje.

’t Waard neare nacht rûnom Jeruzalem,
ynienen gie de himel iepen
foar de ingelwjuk om ta te slaan
om útkomst oan de stêd te jaan,
dat Sion lake mei ien stim.

* Peter Paul Rubens (1577-1640)
Skilderij ‘De nederlaach fan Sanherib’