Archive for the Bibelbylden category

’t Wie de hearen fan de hege rie
mar min nei ’t sin, it wie de pest
dat Jeremia rôp om lânferrie,
se hawwe by de kening west.

Kening Sedekia hie syn nocht,
hy joech de hearen ’t frije rjocht.

Jeremia sakke yn de put,
hie gjin ferwin, ’t wie ta ferdjer,
mar ien man spriek de kening oan, dat wurd
wie fan in Etiopiër.

Sedekia hat him doe betocht,
hy joech de man it frije rjocht.

Ebedmêlek gie de djipte yn
om tou en lapen foar in strop,
it waard fan neare nacht wer sinneskyn,
se hisen Jeremia op.

* Yllustraasje ‘Jeremia út ‘e put’

Jeremia kriich de wurden troch,
dy’t Barûch sette op ‘e rolle,
beide wisten, dit wie net omdoch,
it folk rûn foar it fallen.

Yn de timpel lies de skriuwer foar;
de hurde wurden fan de Iene
fûnen by in klikker ek gehoar,
sadat se fierder giene.

Keninklike hearen waarden kjel
fan al dy wurden fan de Iene,
leine net har hege funksje del,
sadat se fierder giene.

Kening Jojakim waard hjit en poer
doe’t hy it fjurrich skrift oanhearde,
’t wie him fuortendaliks oer,
hy soe der wol mei rêde.

It wie in tiid fan skrift en fjoer,
fan lêze en ferbrâne,
want it wie de Iene oer,
de foarst foel oer de râne.

* Yllustraasje ‘Jeremia en Barûch’
Yllustraasje ‘Kening Jojakim ferbrânt de boekrolle’