maart 18, 2020
fan Jheronimus Bosch*
Wat de ingel trochjûn hat
oan my op ’t eilân Patmos,
is Kristus’ iepenbiering,
sa is ’t wierlik bard.
Lokkich dy’t dit lêst en heart,
it binne wiere wurden
as sprutsen troch profeten,
opskreaun op dit blêd.
Kristus komt de eare ta,
as earste út ’e deaden
is Hy ta libben kommen…
’t is foar ivich sa.
Alleman sil Him ris sjen
as Hy komt mei de wolken,
dat alle folken leauwe,
nimmen giet ferlern.
* Jheronimus Bosch (sirka 1450-1516)
Skilderij ‘Jehannes op Patmos’
maart 14, 2020
fan ûnbekend*
Net allinnich ingels falle,
mar ek lju dy’t lasterje de Hear,
sy folgje ’t minne paad fan Kaïn,
hy hat foar God net bûge wollen.
Beammen dy’t gjin fruchten jouwe,
wolken sûnder wetter foar de grûn,
sa binne lju dy’t foar it kwea gean,
har paden kin men net fertrouwe.
Wylde weagen dy’t it skom opspatte,
stjerren dwalend yn it grut hielal,
sa binne lju dy’t yn it kwea stean,
mei God en syn geboaden spotte.
Mar jim moatte op it leauwe bouwe,
bidde om de stipe fan de Geast,
ferwachtsje dat de Hear wol trou is,
dat leauwe sil jim net berouwe.
* Plakette ‘Kaïn en Abel’