oktober 21, 2026
Wannear’t de foarst him takeart nei
in teken oan de himel,
dan kruse steat en godsbesef elkoar,
de foarst is yn opteine steat,
beseft dat beide kinne troch ien doar,
De foarst is tagelyk ek man
en heit, net yn fertrouwen
mei frou en soan, it giet net mei elkoar
mei as gefolch twa kear in moard,
de ienheid flechtet troch de achterdoar.
De twaspjalt skuort it godsbesef
fan foarst en fan de tsjerke,
dus ropt hy hege godslju by elkoar
foar oerlis oer it godsbesef:
‘Rop Kristus út ta God!’ klinkt klear yn koar.
Sa rinne steat en godsbesef
lykop ta heger ienheid,
de foarst ferkeart no yn opteine steat
lykas de tsjerke mei ’t besef:
de stipe fan de foarst is net ferkeard.
oktober 14, 2026
It binne gjin ferhalen
om te harkjen nei in massamoard
fan joaden yn ferskate kampen,
want sensaasje weacht net swier,
’t is stjerrend wier.
De wierheid mei net swije,
lit har klinke mei it skelste lûd
oer joaden dy’t troch rampen troffen
waarden, oerbleau noch gjin hier,
’t is stjerrend wier.
It binne gjin ferhalen
om te harkjen nei in massamoard
fan Palestinen yn de doarpen,
want sensaasje weacht net swier,
’t is stjerrend wier.
De wierheid mei net swije
as ek joaden moardzje yn it rûn,
de ramp foar alle Palestinen
oer de grins fan minsklikheid,
it is in feit.
