november 9, 2026
Net dat hy samar foel,
gjin sprake fan in hertoanfal,
fatale oerhaal yn de krún
of yn de stikstof stikke,
needwaar wie de oarsaak fan syn fal.
Hy kaam diagonaal
te lizzen, lykas woe er wer
oerein, de need hold tsjin syn krún
en stam, sa lei hy jierren
lang yn ûnmacht, mompeljend: ‘Ik stjer.’
De rûge hûd liet los,
wat wie ’t begjin fan syn ferfal,
hy smeke om eutanasy,
gjin bile, troch in seage
wie syn lijen oer en kaam syn fal.
november 6, 2026
Goadesoademiter,
sa flokten dy twa knapen
yn de timpel fan de god
dy’t mei syn hammer swaaide
foar felle flits en fûle klap,
sy hiene him te fiter.
Hiene dy twa maten
wol troch dat sy de timpel
skeinden fan de tongergod?
Sy waarden net kastrearre,
har earen bleauwen sûnder kleau,
te jong om oer te praten.
Ald genôch om nei de
see te gean foar ’t straffen
troch de floed, sy waarden oan
in peal bûn wylst de brâning
oer ’t strân nei beide jonges kroep,
har rop om help ferwaaide.
Net foar kening Redbad,
hy koe de drinkeldea net
oansjen, brocht de tongergod
in offer foar it libben,
sa hat er beide knapen ret.